Fizika, riyaziyyat və informatika təmayüllü Respublika Liseyinin X sinif şagirdi Ayxan Kazımlı 2023-cü ildə UWC (Beynəlxalq Dünya Kolleci) proqramını qazanıb. Təxminən 107 000 dollar təqaüd alan Ayxan Kazımlı 2023-2024-cü tədris ilindən təhsilini Çində IB proqramı üzrə davam etdirəcək.
UWC Azərbaycan Komitəsinin yaydığı məlumatda bildirilir ki, 2023-cü il üzrə seçim prossesi yekunlaşıb: “Seçim prosesindən uğurla keçərək, UWC Azərbaycan Milli Komitəsinin etimadını qazanmış Ayxan Kazımlını sizlərə təqdim edirik! Fizika, riyaziyyat, və informatika təmayüllü Respublika liseyinin şagirdi olan Ayxan Milli Komitənin təqdimatı əsasında Çində yerləşən UWC Changshu China Kollecində 2023-2025-ci illərdə tam təqaüdlə təhsil alacaq.
Məktəbinin əlaçısı olan Ayxan 2022-ci ildə Beynəlxalq STEAM Azərbaycan Festivalında gümüş medalın sahibidir. İstedadını fərqli sahələrdə sınayan şagirdimiz tar ixtisası üzrə musiqi məktəbi məzunu olmaqla yanaşı, Gənclər və İdman Nazirliyi tərəfindən keçirilən şahmat yarışında gümüş medal qazanmış, həmçinin “Məktəblilər üçün elektronika” təlim proqramını (Technest scholarship) uğurla tamamlamışdır.
Bakı Amerikan Mərkəzində fəaliyyət göstərən “Green club” üzvü olaraq ətraf mühitin qorunması sahəsində iki illik fəaliyyəti ilə seçilən Ayxan kompüter elmi və ətraf mühitinin davamlılığı sahələrinə olan dərin marağını qurduğu online platformada təzahür etdirir. Platformasının əsas məqsədi həmyaşıdlarını dünyada müsbət dəyişiklik yaratmaq üçün texnologiyadan necə istifadə edə biləcəkləri barədə düşünməyə ruhlandırmaqdan ibarətdir.
Ayxan parallel olaraq “GuarantEdu” adlı start-up layihəsi ilə məşğul olur. Layihənin missiyası universitetlərə müraciət edən orta məktəb şagirdlərini hazırda həmin universitetlərdə təhsil alan tələbələrlə əlaqələndirərək, şagirdlərin məlumat və dəstək alması sayəsində universitet həyatına uyğunlaşma müddətini asanlaşdırmaqdan ibarətdir.
Yaşadığı mühiti texnoloji yeniliklərlə yaxşılaşdırmağı hədəfləyən Ayxanın ən böyük həvəsi texnoloji inkişaf, ətraf mühitin mühafizəsi və yeni biliklərə yiyələnmək kimi sahələrdə bilik və bacarıqlarını təkmilləşdirməyə davam etməkdir.
Asudə vaxtlarını şahmat oynamaqla, tar və gitara kimi musiqi alətlərində ifa etməklə keçirən Ayxan həm də basketbol idman növü ilə məşğul olur.
UWC Changshu Kollecində Azərbaycanı təmsil edəcək ilk şagirdimizi təbrik edir və böyük uğurlar arzu edirik!
Ayxan gələcəkdə kompüter elmləri sahəsində təhsil alıb fərqli həllər yaratmaq, reallaşdıracağı ideyaları ilə insanların həyatında əhəmiyyətli dəyişikliklər etmək və dünyamızı yaşam üçün daha yaxşı bir yerə çevirməkdir”.
Qeyd edək ki, Ayxan Kazımlı jurnalist, Regional İnsan Hüquqları və Media Mərkəzinin sədri Xalid Kazımovun oğludur. Xalid Kazımov oğlunun təhsildə qazandığı böyük uğura özünün sosial şəbəkədəki səhifəsində belə reaksiya verib: “Ali məktəbə qəbul xəbərimi alıb evə doğru gələn atamın yerişini bugünkü kimi xatırlayıram, yəqin ki, ömrüm boyu da unutmayacağam. Uçmaq anında olan adamın yerişini təsəvvür etmək elə də çətin olmaz. O zaman çox təəccüblənmişdim. Mənim üçün adi olan bu xəbər atama nədən bu qədər təsir edib? İndi anlayıram mənim indiki yaşımdan cəmi 3 yaş böyük olan atamı göylərə qaldıran xəbərin səbəbini. Sən demə, övladın adi uğuru bir valideynə dünyanın ən böyük sevincini yaşada bilərmiş. Hələ bu uğur təhsil adına, ölkən adına, Vətənin, Bayrağın adına ola. Nurayın ailəmizə yaşatdığı təhsil sevincindən sonra, Aykhanın nailiyyətləri qürurvericidir. Vahidin oğlu olaraq yaşamağın verdiyi qürura artıq Nurayın və Ayxanın atası olaraq yaşamaq sevinci də əlavə olunur. Məcburi köçkünlüyün mənim həyata keçirə bilməyimə mane olan təhsil arzularımı Sizlərin reallaşdırmağının sevincini yaşayıram.
UWC Azərbaycan komandasının Ayxanın qəbul xəbərində yazılan fəaliyyətlərini oxuyanda bunları 15 ilə necə sığdırdığına, doğrusu, həm də təəccübləndim. Baxmayaraq ki, hər getdiyi kursun, hər qatıldığı yarışın, hər çatmaq istədiyi məqsədin bir parçası olmaq üçün həmişə yanında olmağa çalışmışam. Demək, qarşıya bir məqsəd qoyulubsa, o məqsədə çatmaq üçün əzm, iradə, cəsarət ortaya qoymaq mümkün olursa, istənilən zirvəni fəth etmək olar.
Ötən il UWC məktəbləri Azərbaycan üçün ilk dəfə qəbul keçirəndə Ayxan heç kimə demədən müraciət etmişdi. Biz Nurayın təhsili ilə məşğul olarkən, qəbul alıb bizə surpriz etmək istəyirdi. Müsahibə mərhələsinədək irəliləyə bilmişdi. Son mərhələni keçməsə də, son bir ildə həm akademik, həm sosial fəaliyyətlərini, həm də bacarıqlarını bir qədər də inkişaf etdirdi. Qatıldığı təlimlər, yaratdığı start-up layihəsi ilə məqsədinə doğru bir az da yaxınlaşdığının fərqində idim.
UWC Changshu Kollecində Azərbaycanı təmsil edəcək ilk şagird olmaq isə həm də əlavə bir məsuliyyət yaradır. Demək, həmin məktəbdə Azərbaycan adına formalaşacaq rəyi sən yaradacaqsan. Qarşıdakı təhsil həyatında bol-bol uğurlar arzulayıram oğlum. Səninlə qürur duyuram. Səni bu yaşda ölkədən kənara göndərmək nə qədər çətin olsa da, inanıram ki, UWC Changshu Kollecində alacağın iki illik təhsil gələcək planlarını həyata keçirmək üçün çox gözəl bir fürsət yaratmış olacaq sənə. Eyni zamanda oraya özünlə bir Azərbaycan aparıb, Vətənini və Bayrağını qürurla təmsil edəcəksən.
Ayxanın təhsil yolunda bələdçisi olan bütün müəllimlərinə minnətdaram.
UWC Changshu Kolleci Ayxana 100 faiz təqaüd ayırıb. Changshu Kollecinə qəbul prosesində və iki illik təhsil üçün ayrılan təxminən 107 min dollar təqaüdün əldə olunmasında zəhməti keçən #UWCAzerbaijan komandasına ayrıca təşəkkür edirəm”.
Onu da qeyd edək ki, Ayxan Kazımlı əslən Kəlbəcər rayonunun Başlıbel kəndindəndir.
Bashlibel.az
Ayxan qurban olum .Sənə gözəl günlər,sağlam zehin ,həyatda ən yaxşı nə varsa sənə qismət olmasını Allahdan arzu edirəm .
Fəxrimiz, Ağsaqqalım sənə uğurlar.