İsrailin Baş naziri Benyamin Netanyahu Qüdsdə Argentinanın “sionist” prezidenti Xavyer Miley ilə keçirdiyi birgə mətbuat konfransında İranla bağlı dünyanı sarsıdan bəyanatlar verib.
Bashlibel.az Musavat.com-a istinadən xəbər verir ki, Netanyahu İranla müharibənin hələ başa çatmadığını və hər an yeni, gözlənilməz hadisələrin baş verə biləcəyi barədə xəbərdarlıq edib.
Netanyahu İsrailin ABŞ ilə sıx koordinasiyada İrana qarşı “sivilizasiyanın barbarlığa qarşı savaşı”nı apardığını bildirib. O vurğulayıb ki, son aylarda İranın hərbi və iqtisadi infrastrukturuna, o cümlədən polad sənayesinin 70%-nə endirilən zərbələr böyük uğur olsa da, bu, hələ son deyil.
Baş nazir regiondakı gərginliyi “partlayış həddində” kimi xarakterizə edib: “Biz böyük şeylərə nail olduq, lakin bu, hələ son deyil. Hər an yeni hadisələr baş verə bilər. Kim bilir sabah, ya birisigün nə olacaq”.
Dünyanın ən radikal İsrail tərəfdarı kimi tanınan Xavyer Miley, İrana qarşı müharibədə İsrailin yanında olduqlarını və Argentinanın bu məsələdə ABŞ-la “mütləq həmrəylik” nümayiş etdirdiyini bəyan edib. O, İranı “bəşəriyyətin düşməni” adlandıraraq Argentinanın səfirliyini Qüdsə köçürmək planlarını təsdiqləyib.
Netanyahu əməliyyatların Donald Tramp ilə tam koordinasiya edildiyini və İranın hələ də zəifləmiş vəziyyətdə olduğunu bildirib. İranın Hörmüz boğazını yenidən bağlamasından dərhal sonra səslənən bu bəyanat, İsrailin boğazı güclə açmaq üçün yeni hava zərbələrinə hazırlaşdığına dair siqnal kimi yozulur.
İsrail rəhbərliyi həmçinin Livanın cənubunda işğal zonasını genişləndirdiyini və “Hizbullah”a qarşı ən ağır zərbələrin endirildiyini açıqlayıb. Netanyahunun “hər an hər şey ola bilər” sözləri, aprelin 21-də bitəcək müvəqqəti atəşkəsdən sonra İranın nüvə obyektlərinə birbaşa hücumların başlaya biləcəyi ehtimalını maksimuma çatdırıb.
Bashlibel.az
